போயஸ் கார்டன் லன்ச்

தீபாவளி மலருக்காக இந்த வருடம் எதை பற்றி எழுதலாம் என்று யோசனையில் அப்படியே கால்நடையாக டீக்கடையில்” டீ” சாப்பிட்டு விட்டு வாகனத்தை எடுத்துக்கொண்டு அப்படியே பாண்டி பஜார் போகலாம் என்று வண்டியை செலுத்த, “கமலாலயம்” அருகே  சலசலப்பாக இருக்க என்னவென்று நான் சென்று பார்க்க, அங்கு திருமதி ஒய்.ஜி மதுவந்தி கட்சி தொண்டர்களுடன் விவாதித்து கொண்டிருக்க,

நம்மைப் பார்த்ததும் ஹலோ உசேன் எப்படி இருக்கீங்க என்ன நம்ம கட்சியில உறுப்பினரா சேர வந்தீங்களா!! என்று நம்மை பார்த்து கேட்க,

மேடம்நாம எப்பவுமே ‘சோத்துக்கட்சி ‘தான்.. நமக்கு சோறு கண்ட இடம்தான் சொர்க்கம் அப்படின்னு சொல்லிட்டு..

நேர்காணல் பண்ணா என்ன என்று மனதில் ஒரு மணியோசை அடிக்க, அதை அவரிடம் கேட்க..

வாங்க

என்று சொல்லி வரவேற்பு அறையில் நம்மை அமர வைத்து என்ன கேட்கணும் கேளுங்க என்றார்.

“அவசரத்தில் நாம் கேள்விகளை தயார் பண்ணாத காரணத்தால் எப்படி ஆரம்பிப்பது என்று தெரியாமல் சரி கேட்டு வைப்போம் என்று முதல் கேள்வி முன் வைத்தோம்.

நாம் ; நீங்க கலைத்துறைக்கு எப்ப வந்தீங்க ?

மது ; 1996 சக்தி நாடகம் தான் என்னோட கலை உலகத்துக்கு முதல் பயணம்

நாம் _தனியார் தொலைக்காட்சியில் நீங்க சூப்பர் 10 நிகழ்ச்சியில நடிச்சிட்டு இருந்தீங்க.. அதுக்கப்புறம் உங்களை தொலைக்காட்சியில் பார்க்க முடியலையே ஏன்?

மது ; அதுக்கப்புறம் ஒரு எட்டு ஒன்பது வருஷமா நான் கலைத்துறையை விட்டு ஒதுங்கி இருந்தேன். அதுக்கு காரணம் என்னோட திருமண வாழ்க்கை.. குடும்பத்தை கவனிக்க கலை உலகத்திற்கு ஒரு சின்ன பிரேக்.

நாம் ; நாடகத்தில் உங்களுக்கு போட்டியா யார நினைக்கிறீங்க ?

மது ; நாடகத்துல எனக்கு போட்டின்னு பார்த்தா யாருமே இல்ல.. நாடகத்தில் நடிக்க நிறைய பேர் முன்வருவதில்லை. காரணம் இதுல வருமானம் பெருசா எதுவும் இல்லை . எனக்கு போட்டின்னு பார்த்தா என்னோட “கதாபாத்திரம் “தான். எந்த பாத்திரம் நாம நடிச்சா மக்கள் பாராட்டுறாங்களோ அந்த கதாபாத்திரம்தான் எனக்கு  போட்டி. ஏத்துக்கிட்ட ரோலை சிறப்பா செய்யணும். அது மக்கள் மத்தியில பேசப்படணும். அதனால நான் நடிக்கிற கதாபாத்திரங்களை தான் நான் போட்டியா நினைக்கிறேன்.

நாம் ; உங்கள் தந்தை குழுவில் நடிப்பை கற்றுக்கொண்டு தனியாக நாடக குழு ஆரம்பிக்க காரணம் ?

மது ; தனியா நாடக குழு ஆரம்பித்ததற்கு காரணம் அப்பாவுக்காக தான். அப்படி ஆரம்பிச்சு நாங்க போட்ட முதல் நாடகம் நான் முதல்ல நடிச்ச “சக்தி” நாடகம் தான்..  மறுபடியும் மேடை அரங்கேற்றினோம். எங்க அப்பாவுக்காக டெடிகேட் பண்ணத்தான் நான் தனியா குழு ஆரம்பித்தோம்.

நாம் ; உங்க அப்பாவை உங்க நாடகத்தில் நடிக்க வச்சீங்க. உங்க சித்தப்பா “சூப்பர் ஸ்டார்” ரஜினிகாந்த்.. அவர உங்க நாடகத்தில் நடிக்க வைப்பீங்களா ? நடிக்க கேட்பீங்களா ?

மது ; சூப்பர் ஸ்டார் எங்க நாடகத்தில் நடிச்சா அதைவிட உலகத்துல வேற எந்த சந்தோஷமும் எனக்கு கிடையாது. ஆனால் அது நடக்குமான்னு எனக்கு தெரியல. இன்னிக்கு சூப்பர் ஸ்டாரா அவருடைய பணிகள் ஏராளம். அதுக்கு நடுவுல என் நாடகத்தில் நடிக்கனும் என்று கண்டிப்பா நான் கேட்க மாட்டேன். கடவுள் அருளால் அப்படி நடந்தா இதைவிட பெரிய பாக்கியம் எதுவுமே இல்லை.

நாம் ; நீங்க நடிச்ச நாடகத்தில் உங்களுக்கு பிடித்த நாடகம் ?

மது ; பெருமாளே 1

நாம் ; என்னது ஒன்னு, ரெண்டுன்னு இருக்கு ?

மது ; ஆமா.. சினிமால பார்ட்-1 பார்ட் 2 மாதிரி நாடகத்துல நாங்க தான் முதல் முறையா பார்ட் 1 பார்ட் 2 அப்படின்னு பெருமாளே-1 நாடகத்தை மேடையில் நடத்தினோம். அதுல பெருமாளே 1 எனக்கு ரொம்ப புடிச்ச நாடகம் .

நாம் ; நீங்க ஒரு சிறந்த பரதநாட்டிய கலைஞர். பரதநாட்டியத்தை தொடருவீங்களா ?

மது ; கண்டிப்பா. நாட்டியத்தை நான் எப்பவும் மறக்க மாட்டேன். வருஷத்துக்கு ஐந்து ஆறு நடன நிகழ்ச்சி நடத்திக் கொண்டுதான் இருக்கிறேன். நாடகம் வாரத்திற்கு இரண்டு முறை, வருடத்திற்கு 100 முறை என்று மேடை ஏற்றி கொண்டு தான் இருக்கிறோம்.

நாம் ; உங்கள் மகன் ரித்விக் ஒரு இசைக் கலைஞரா அவர் பயணத்தை தொடங்கி இருக்கிறார்.. நடிகராக மாற வாய்ப்பு இருக்கிறதா ?

மது ; இத நீங்க அவர் கிட்ட தான் கேட்கணும். இசைக்கலைஞர் ஆகவும் பாடகராகவும் தன் பயணத்தை தொடங்கி இருக்கும் என் மகனுக்கு நடிகனானால் கண்டிப்பாக என்னுடைய சப்போர்ட் இருக்கும்.. ஆனால் அதை அவர் தான் முடிவு பண்ணனும்.

வெறும் கலைத்துறையைப் பற்றி கேட்டுக் கொண்டிருக்கிறோமே.. சரி அரசியலுக்கு மாறுவோம் என்று நம் பட்சி சொல்ல, கேள்விகளை ஆரம்பித்தோம்..

நாம் ; உங்க தாத்தா மறைந்த ஒய் ஜி பார்த்தசாரதி, திரு எம் ஜி ராமச்சந்திரன் அவர்களிடம் மிக நெருக்கமான நட்பு கொண்டவர். உங்கள் தந்தை தற்காலிக அரசியல் தலைவரிடம் நெருங்கி நட்பு பாராட்டக் கூடியவர். அவர்கள் வராத அரசியலுக்கு நீங்கள் வந்த காரணம் ?

மது ; இதுக்கு ஒரு வரி பதில் தான்..  காரணம் மதிப்புக்குரிய திரு நரேந்திர மோடி மட்டுமே.  அவருக்காக மட்டுமே நான் அரசியலுக்கு வந்தேன்.

நாம் ; தேசிய அரசியல் கட்சியில் இருக்கீங்க. தேசிய அரசியலில் ஈடுபட வாய்ப்பு இருக்கா ? ஈடுபடுவீங்களா ?

மது ; கண்டிப்பா.. அதுதான் என்னோட லட்சியமே,, ஆனா எங்க கட்சி கட்டுக்கோப்பான  கட்சி. கட்சி தலைமை சொல்லுச்சுன்னா கண்டிப்பா தேசிய அரசியலில் ஈடுபட்டு மக்கள் சேவையில தொடந்து ஈடுபடுவேன்..

நாம் ; உங்களை சினிமாவுல அதிகம் பார்க்க முடியலையே! ஏன் ?

மது ; அதுக்கு காரணம் அரசியல் தான். எல்லா ஸ்டேட்லயும் அரசியலையும் சினிமாவும், தனித்தனியா தான் பாக்குறாங்க. பக்கத்து ஸ்டேட்ல நடிகர் பிரகாஷ்ராஜ் பிரதமர் நரேந்திர மோடிக்கு எதிர்மறையா தான்  பேசிட்டு இருக்கார். அதே சமயம் சினிமாவில் பிஸியாவும் இருக்கார். அங்கு அரசியல், சினிமாவை பிரிச்சு பாக்குறாங்க.. ஆனா இங்க சேர்த்து வச்சு பார்க்கிறாங்க. அதுதான் காரணம். ஆனா நான் இந்த கேரக்டர் பண்ணா நல்லா இருக்கும் அப்படின்னு நினைச்சு வர்ற இயக்குனர்கள் இருக்காங்க. “பி .டி .சார்” படத்துல கூட அந்த கதாபாத்திரத்துக்கு நான் தான் சரியா இருப்பேன்னு  என்னை நடிக்க கூப்பிட்டாங்க. நான் நடிச்சேன். எதிர்காலம் என்னன்னு மக்கள் தான் சொல்லணும்.

நாம் ; மதுவந்தியை பற்றி மற்றவர்கள் பார்வையில் உங்கள் கருத்து

மது ; என்ன பத்தி ட்ரோல்-ஆ பல பேர் எதிர் மறையாவும்  கிண்டலாகவும் நிறைய வதந்திகள் பேசிக்கிட்டு தான் இருக்காங்க.. அதுக்கு காரணம் நான் சார்ந்து இருக்கிற கட்சியும், என்னோட சமூகமும் தான். ஆனா அவங்க பேச்சு என்னோட வளர்ச்சிக்கு படிக்கட்டா தான்  இருக்கு. அவங்க பேச பேச நான் வளந்துக்கிட்டு தான் இருக்கேன். அவங்க அப்படி பேசுறாங்கன்னு நான் கவலைப்படவும் இல்லை. என்னோட பாதையில நான் நேர்வழியில் தான் போயிட்டு இருக்கேன்.

நாம் ; தீபாவளி ஒரு வரியில் பதில் சொல்லுங்கள்?

மது ; போயஸ் கார்டன் லன்ச்

அடுத்த கேள்வி ஆரம்பிப்பதற்குள் மாநிலக் கட்சி தலைவர்  அண்ணாமலை வர இதற்கு மேல் பேட்டி தொடர்ந்தால் கட்சிப் பணி பாதிக்கும் என்பதால் அட்வான்ஸ் தீபாவளி வாழ்த்துக்களை கூறிக்கொண்டு நான் விடைபெற்றுவோம். மேகம் கருக்க, வானொலியில் இடி மின்னலுடன் மழை வரும் என்று அறிவிக்க, நாம் தைரியமாக வாகனத்தை ஓட்டிக்கொண்டு வர, மேகம் விலகி சூரியனின் அரசாட்சி நடைபெற ஆரம்பித்தது.

எழுத்து ; ஏ கே உசைன்