சூர்யா நடித்த ஜெய் பீம் படத்தை இயக்கியவர் த.செ. ஞானவேல். அந்த முதல் படத்திலேயே பார்வையாளர்களின் மனதை உருக்கும் விதமாக நிஜத்தில் நடந்த சம்பவத்தை மையப்படுத்தி ஒரு அற்புதமான படத்தை கொடுத்திருந்தார் ஞானவேல். அவருக்கு மட்டுமல்ல சூர்யாவுக்கும் அது மிகப்பெரிய பாராட்டுகளை குவித்தது. இந்த படத்தின் வெற்றிதான் தனது இரண்டாவது படத்திலேயே சூப்பர் ஸ்டார் ரஜினிகாந்தை வைத்து இயக்கும் வாய்ப்பை ஞானவேலுக்கு தேடிக் கொண்டு வந்து கொடுத்தது.
இந்த படத்தில் பகத் பாஸில், ராணா உள்ளிட்ட மற்ற மொழி முன்னணி நடிகர்களையும் சேர்த்து படம் இயக்கி வருகிறார் ஞானவேல். அடுத்ததாக பாலிவுட்டில் இருந்து ரன்வீர் சிங்கையும் இந்த படத்தில் நடிக்க வைக்க இருப்பதாக ஒரு தகவல் வெளியாகி உள்ளது. கிட்டத்தட்ட இந்த படத்தின் படப்பிடிப்பு முடிய இருக்கிறது.
இதனை தொடர்ந்து அடுத்து விஜய் படத்தை இயக்குவாரா, அஜித் படத்தை இயக்குவாரா என ரசிகர்கள் எதிர்பார்த்து இருக்க இவரோ அனைவருக்கும் ஆச்சரியம் கொடுக்கும் விதமாக தெலுங்கில் இளம் முன்னணி நடிகரான நானியை வைத்து தனது படத்தை இயக்க இருக்கிறார் என்கிற தகவல் தற்போது வெளியாகி உள்ளது.
நானியும் நல்ல நடிகர் தான்.. முன்னணியை நோக்கி நகர்ந்து வரும் நடிகர் தான் என்றாலும் ரஜினி ரேஞ்சுக்கு படத்தை இயக்கி விட்டு இப்படி ஒரு சின்ன நடிகரின் படத்தை இவர் இயக்குகிறாரே என ரசிகர்கள் கொஞ்சம் அதிர்ச்சியும் ஆச்சரியமும் கலந்து இவரை பார்க்கிறார்கள்.
